काठमाडौं - व्यस्त जिवनशैली, अत्याधिक भागदौड र तनावग्रस्त जीवनशैलीले धेरैजसो व्यक्ति गर्दन दुख्ने समस्याले ग्रस्त भएका छन् । गर्दनको हड्डी खिएर, नसा च्यापीएर र मांसपेशीको दुर्वलताको कारणले गर्दन दुखाई हुने बिज्ञहरुको भनाई छ ।
कुनै व्यक्तिमा यस्ता समस्या देखिएमा गर्दनका मांसपेशिलाई बलियो बनाउन व्यायाम गर्नुपर्ने हुन्छ। उभिरहेको, बसिरहेको वा उत्तानो परेर सुतेको बेलामा व्यायाम गर्न सकिन्छ । तर बसेको अवस्थामा व्यायाम गर्दा बढ़ी प्रभावकारी हुने देखिन्छ । गर्दन दुख्दा गर्नुपर्ने केहि व्यायामहरू यस्ता छन् ।
दुवै हातले अगाडी र टाउकोले पछाडि ठेल्ने
ढाड कम्मर गर्दनलाई सीधा राखेर बस्ने। त्यसपछि दुबै हातका औलाहरू कैची पारेर हत्केलालाई टाउकोको पछाडिपट्टी राख्ने । हात राखेपछि हातले टाउकोलाई अगाडी र टाउकोले हातलाई पछाडि पट्टी धकेल्ने र २० सेकेण्डसम्म रोकेर राख्ने गर्नुपर्छ ।
दुवैहातले पछाडि र टाउकोले अगाडितिर ठेल्ने
ढाड कम्मर सीधा राखेर बस्ने । त्यसपछि दुबै हातलाई जोडेर हत्केलालाई निधारमा राख्ने । हात राखेपछि हातले टाउकोलाई पछाडि र टाउकोले हातलाई अगाडि पट्टी धकेल्ने र २० सेकंकेण्डसम्म रोकेर राख्ने गर्नुपर्छ ।
देब्र हातले दाहिनेतिर र टाउकोले देब्रेतिर ठेल्ने
पूर्ववत अवस्थामै बस्ने र देब्रे हातलाई उठाएर देब्रे कन्चटमा राख्ने । त्यसपछि देब्रे हातले दाहिने तीर ठेल्ने र टाउकोले देब्रे तीर ठेल्ने र २० सेकेण्डसम्म रोकेर राख्नुपर्छ ।
दाहिने हातले देब्रेतिर र टाउकोले दाहिनेतिर ठेल्ने
पूर्ववत अवस्थामै बस्ने र दाहिने हातलाई उठाएर दाहिने कन्चटमा राख्ने। त्यसपछि दाहिने हातले देब्रेतीर ठेल्ने र टाउकोले दाहिने तीर ठेल्ने र २० सेकेण्डसम्म रोकेर राख्नुपर्छ ।
यी सबै व्यायामहरुलाई ५ पटक दोहोर्याउनु पर्छ ।
(लेखक डा हेमराज कोइराला योगी नरहरिनाथ योग तथा प्राकृतिक चिकित्सालयको मेडिकल डाइरेक्टर हुन्)
